Grøne fasadar og solceller: Ny rapport om brannsikkerheit
Ein ny studie frå RISE Fire Research, finansiert av Direktoratet for samfunnstryggleik og beredskap (DSB) og Direktoratet for byggkvalitet (DiBK), gir viktig innsikt i brannsikkerheit for fasadar med solcellepanel og grøne plantesystem. Målet var å avdekkje kva faktorar som påverkar risikoen for brann og korleis slike fasadar kan utformast for å redusere brannfare.
Fasadar med solcellepanel og grøne plantesystem har mange fordelar. Solcellepanel bidreg til produksjon av fornybar energi, medan grøne plantesystem kan redusere energiforbruk, fange CO₂, dempe støy og luftforureining, handtere overvatn og skape meir attraktive bymiljø. Med auka bruk av slike system er det likevel avgjerande å vareta brannsikkerheita.
Solceller
Forsøka viser at risikoen for brannutvikling blir påverka av:
- Avstanden mellom solcellemodul og vegg
- Materialval i solcellemodulane
- Brennbarheit i holrommet bak modulane
Kort avstand (6 cm) og modular med éin glasside og eksponert plast bakside gav den kraftigaste brannintensiteten. Å auke avstanden mellom vegg og modul eller bruke tosidig glas reduserte risikoen betydeleg.
Grøne plantesystem
Brannsikkerheita varierer med systemtype og materialval. Forsøka viste at brennbare plantesystem kan føre til nedfall av brennande delar og dropar, noko som kan hindre sløkking, evakuering og føre til brannspreiing. Ubrennbare plantesystem reduserte temperaturen på veggen, men brann i plantane kan likevel føre til intense, kortvarige flammar.
Studien peikar òg på utfordringar med testing og klassifisering, særleg for levande plantesystem som endrar eigenskapar over tid.
Vil du sjå heile rapporten?